الله يرحمك يا أبي بذكرك كل فجر.
علشان انت اللى عودتني عليه.
ياسلام لما كنت تخصني كل يوم.
بمكافأة عن صلاة الفجر.
من البلح الرطب ويا الحنين.
مرة مع المصلين وقت الصلاة.
ومرة على الطبلية فى الفطور بالبيت.
قبل ما اروح المدرسة للتعليم.
وعمى سيد أحمد يفرق علينا.
الجوافة الصابحة من الجنينة.
الله يرحمه ويرحم والدينا.
ويرحم اموات المسلمين.
كنت بعد ما ارجع من المدرسة.
كل يوم العصر اروح لابويا الغيط.
أطل عليه أشوفه محتاج أيه.
يوم أساعده فى حشة البرسيم.
علشان غدى الحلال .
ويوم يقول لى خد الحمار.
أردم الدوار ولا تنسي ذريبة الغنم.
وردم مرقد الجمل يكون ناعم.
وارجع لى تانى علشان.
نرجع بالحلال البيت قبل الغروب.
يوم العطله أصحى من الفجر.
معاك مثل ظلك.
اتعلم منك يا أمين.
يا اللى كنت معلم وأستاذ.
من غير شهادةومن غير معلمين.
أفطر وأسرح معاك الغيط.
تقول خليك تحت شجرة التوت.
الحر شديد ودوار الشمس لعين.
إملى القلة وبل عليها الخيشه.
علقها فى فرع التوته سبيل.
ذاكر فى ظل التوته ي أصيل.
فى الغيط كنت اذاكر.
ولما اروح احل الواجبات.
واخر السهرة تفرد ذراعك.
كأنه مخدة أحط راسى عليه.
اروح فى سابع نوم.
أحسن بأمن وأمان.
وأسمع نبض قلبك.
اعد دقاته كل حين.
وأنا فى حضنك يا أمين.
الله يرحمك يا ابا أنت وأمى
وأموات المسلمين.
ليست هناك تعليقات:
إرسال تعليق